نزار دياب: عَ بكرة رح تطلع شمس

زي بوست:

عَ بكرة رح تطلع شمس
غير اللي كنا نعرفا
ت تضوِّي من جوّا الحبِس
ع الناس ياللي بالعتم
فوق الأرض
مَ بتعرفا

عَ بكرة رح تطلع شمس
غير اللي كنا نعرفا
ت تدوِّب جبال البكي
تَ تسيِّلا
تا تجرفا
تا تحمل خيام القهر
خيام اللي كانوا بالعرا
وَحدُن على حفاف الدِنِى حدُّن مدينة مسكَّرة
حدُّن قرايب بعَّدوا ،صار القرب منن جفا
ع بكرة حَ يدوب البكى
ت تصير خيمتهن سفينة و يرجعوا
ع بلاد رجعتلن حضن
ت تصير خيمتهن سفينة و يرجعوا
بِ ولاد شيّبها الحزن
ت تصير خيمتهن سفينة ويرجعوا
ب شيوخ ما داقت
دفا

و عَ بكرة رح ينزل مطر
كبّ وكإنّو بالسما
فلتان شي تالي سِكِر
كبّ وكإِنْ الربّ حالف ع الأرض
ما يتركا لـَ تصيرلو
جنِّة
تا يشبع الجوعان خبز و لبن عصفور
ت يغنِّي
تا يسهر و تَ ينام تا يقرا شعر
تا تلتغي الفروق كلها و يلتعن
بيّ القصيدة ويلتعن سلّّاف بيُّو
للفقر

عَ بكرة رح ينزل مطر
ت تصير حارتنا حديقة معلّقة و براج
و براج مجبولة بدهب بالمرمر و بالعاج
ت يصير شارعنا قنايِة و طالعة عَ دراج
ع دراج مبرومة سوا كنّن أساور تاج
ت تصير ساحتنا ملاهي مسوّرة بسياج
بسياج من قوس القزح و منوّرة بسراج
بسراج من برج الجدي ،برج الدلو
و أبراج

ع بكرة رح ينزل مطر
ت نعلّق مْرَاجِيح ع هلال القمر
تا يلعبوا الصغار و يدور الفرح
تا تنتلي الجرار و يفور القدح
تا ينفتح شبّاك ع اللي فارقوا
تا يمرقوا بالبال مع نسمة صبح
تا ينفتح شباك للي تناوقوا
من الذاكرة
و يسكّر الشبّاك

و ع بكرة رح تكبر بنت
حنطة وجدايلها سمر
بخدود مزهرهن حيا
بشفاف مقطفهن دوا
والقدّ ميّاس و خصر
مايل على ميل الهوا
و رمّان عم يرقص على
خلخال بالساق انطوى
وعيونها الـ متل الكزب
سبحان الله اللي خلق
والـ ما خلق متلا
بشر

ع بكرة رح تكبر بنت
متل الأميرة بالحلم
رح يخطبا نصّ البلد
وما تقبل بغيرو ولف
هالشب ياللي بينفدى
وياللي بإسمو بينحلِف
هالـ مابحطّا واطية
و مَ بيقبل بحكم الندل
و ياللي إذا بيعشق مرى
بيصير خيّو للعشق
حَ يطلّ من كتب وقصص
ع حصان من لون القطن
و يفلّ من جيش و حرس
ت يفيّقا ببوسة و حضن
تا يقطفا ويتعمشقوا ب شهاب
تا يزرعا بقطرة ندي ع تراب
ت يتَنِتفوا بنت وصبي و حباب
تا تنحكى بليل الأغاني و تنكتب
حدوتِتن بِ كتاب

و ع بكرة ما عندي صبر ما أطولو بكرة
يا مين يعطيني عمر عا قد هالنطرة
و يا مين يفتح للأمل دكان ، نفّقنا
بيّاع يا سامع صدى دخلك مَ تقطعنا
تلِّي دكاكينك أمل
وصّي على بكرة
تَلِّي دكاكينك أمل
تلّي أنا شَرَّى