حسام العبيدي: قصيدة غنائيّة للمعاقين

أنا زيكم ليا حكايات وأحلام كتير
ومانيش سجين الأمنيات
أنا زيكم قادر أكون
واتحدى واعمل معجزات

القوة
فى القلب السليم
وانا قلبى أقوى من الظروف
الخوف ده ضعف وموت بطيء
وانا عمرى ماحسيت بخوف

بإرادتى مش ممكن هتوه
وهعيشها بالقلب البريء
هسند عليكم لما أميل
وأكيد راح أوصل للطريق

ورا كل ضلمة بيجى نور
وأنا مش ها تكسرنى الحياة
لو حلمى مانعه ألف سور
راح اخطي ليه وأفضل وراه

النقص نقص فى العقول
وانا فيا ألف روح وروح
مش معنى عجزي إني اكون
إنسان مالوش حق الطموح

أنا ليا وياكم مكان
مش شخص عالة على الوجود
وبأيدي هلمس السحاب
وأوصل لأبعد الحدود

الحب صانع معجزات
وانا قلبى بيحب الجميع
طول ما انتو أهلي وعزوتي
فى الدنيا مش ممكن هضيع