نزار دياب: تخيّل شي مرّة (قصيدة غنائية)

زي بوست:

تخيَّل شي مرة عَ الصبح
توعى على صوتِ اللي راحوا
بالتِّكِي
يدقُّوا على بوابك
دقّة نِدِي حامل معو
مِدري حنينو للغصن
مِدري البِكي
السايل على عتابك

تخيّل شي مرّة تسمعن
شفافك مَ قادر تطبقا
خدودك مَ قادر تقرصا
عيونك مَ قادر تفركا
قدامك م قادر تمنعن

تخيّل شي مرة تسمعن
يومِ الـ قضيت الليل عا كل شي
نايم كنت عَ مخدتن
بكيان حامل صورتن
وبإيد خلصان القلم
ولسّه مَ خلصت سيرتن

تخيّل شي مرة تسمعن
وتقوم تفتحلن قفل
وِ تشق عَنّن بابك، تردّو
وِ من النعس
ترجع على سريرك غطس
وتلف عا حالك غطا، تمدُّو
تِعيَا كإنَّك ما قمت تِحيَا
تغفى كإنك ما قمت تدفى
تقسى كإنك ما قمت تنسى
وتقول يمكن ما حدا
كَنُّو حلم متل الـ سبق
كنو كلامي اللـ عَ الورق
لليوم تا رَدِّ الصدى

وإنتى و ما حتصدّق
تخيّل كإنو حقّ هالمرة
و فاتوا لجوّا و بطّلوا هالدَّق من برّا
و تجمّعوا حول التخت
لَمحوك و بقيوا عالسَّكت
نطروك تصحى من الوهم
تركوك تختار الوقت
حاموا كإنّن غيم من فوقك
شتّوا بِكي لتفيق عا زوقك

تخيّل شي مرّة تفيق وتشُوفن
تخيّل مَ أحلى الريق عَ كفُوفن

تخيّل شو راح تقول هالمرة
تخيّل شو راح تحس هالمرة
تخيّل بَعِد مرّة
و بعد مرة
و قد ما فيك تتخيّل
تخيّل بعد مرّة